НА ВЕЛИЦЕЙ ВЕЧЕРНИ
НА ГОСПОДИ, ВОЗЗВАХ СТИХИРЫ НА 8, глас 4.Днесь лик святых в земле Тверстей просиявших / купно с нами достойно блажат Пречистый образ Божия Матери «Оковецкия» / и прославляют раболепно, и чествуют, и покланяются, / просяще Ея, яко стену необориму, источник чудес, / благую и теплую заступницу за грешных и смиренных, / оградити от бед, скорбей и грехов // во спасение наше и избавление.
Днесь благоговейно чистыми умы и душами премирныя лицы / почтим явление чудного образа Богоматери, / воспоминая неисчетные чудесные исцеления бывшия на месте явления, / темже и нас, Всеосвященная Сене, / всю надежду и упование положших, / избави от смертоносныя и тлетворныя болезни / и горьких страстей свободи, и спасение подаждь // Божия Мати, Преславная, жизнь Рождшая.
О Дево благая! / О мире Радосте и Прибежище! / О Хранилище верных и избавление, / сияет бо нам светом благодатным образ света присносущного, / имже озаряюще благодарне вопием: / избави, Чистая от тли рабы Твоя, / верно поющих единомышлением души прославляюще / и хваляще божественную Твою державу // и православно покланяющихся образу Твоему.
Светло/ торжествуем ныне, / веселимся и радуемся, во псалмех и песнех духовных / празднующе образ Пресвятыя Богородицы, / дарованный нам во отраду скорбящим / и от злых духов томимым / и от сердца со слезами припадающа взываем Тебе: / призри на ны грешныя рабы Твоя / и из Тебе рождшагося Христа Бога нашего моли, / да сподобит нас всегда творити всесовершенную и святую волю Его, // спасти души наша, яко благоутробен.
Благодарственне Тя по долгу воспеваем Празднественная, / Превысшую Херувим и Славнейшую Серафим, / Виновницу нынешняго светлаго торжества, / Матерь Господа Небесных сил, / с превечным на руку младенца, Создателя всея твари / и иже с ними богомудрого предстоящего святителя и чудотворца Николая, / и молится тебе по Бозе, мир умирити в православии, / страну нашу сохранити и спасти от всех зол благонравныя и богобоящиеся рабы Твоя, // яко Едина Чистая и Благословенная.
Радуйся, Богородице, / Мати Христа Бога нашего, / надежде верных и утверждение, / прибежище и помощь, / верою и надеждою покланяющихся пречистому образу Твоему, / явленному на брегах реки Вырешки / и направившую чрез сие чудное видение / на путь исправления конокрадов, / собравшихся в тыя дни на месте тайной встречи злого своего замысла. / Темже и мы свободимся во образ их исправления / от всякаго греха и беззакония, // и добраго ответа на страшном судищи Христовом.
Днесь просветится православных собрание, / еретический и иже им подобный полк да посрамится, / поклоняемую видя икону Божия Матери, / дарованную нам во утверждение благочестия / и обновления Богом избраннаго русского народа, / сего ради целующе ю, покланяемся и Кресту Честному, / изображенному на святей иконе, / прося Распятаго на нем Человеколюбца / сподобити нас части святых Его, / от века угодивших Его всеблагой воле, // молитвами ради всеблаженныя Богородицы, Чистыя Приснодевы.
Сердцем постигнем, умом обымем, / душею восприимем и усты исповедуем / божественную славу Неискусобрачныя Девы / и вси людие днесь видите чудная и преславная, / и духовно возвеличим Независтный Источник, поюще, / дарованную нам, яко многоценное богатство // икону Пресвятыя Богородицы.
СЛАВА, И НЫНЕ, глас 3: Како не дивимся вернии, / Божия слова паче словесе Родительнице Пречестной! / Кто из земнородных не воспоет Пренепорочную, / украшение и всем согрешающим Предстательницу / пред Престолом Царя царствующих Господа господствующих! / Кто не прославит явление всесветлого образа Твоего в пределах Тверския земли / яко Приснотекущий Источник чудес, / изливающий благодатныя струи богодейственны, / целительны душам и телесем: / темже радуйся, ангельский глас взываем Тебе, Мати Дево Владычице; / родила бо еси великого совета Ангела / и Отцу собезначальна, плоть бывшаго; / радуйся, Дево, упование наше и прибежище, / за еже спасти человека, // православно Богородицу исповедающим Тя.
СТИХИРА НА ЛИТИИ, глас 4: Икону Твою, Пресвятая Богородице, / даровала еси Тверстей земле и граду Москве, / яко покров, и славу и необоримую стену, / пристанище спасительное обуреваемым всегда, / сего ради поем Тебе, огради нас, Царице Небесная / от безбожных иноплеменник, от глада, труса и междоусобныя брани, / а наипаче от ересей и расколов и тлетворных ветров века сего, / разоряя тех коварствия и низлагая на землю их гордынное шатание, // Ты бо еси вся можеши, Владычице Чистая.
СТИХИРА НА СТИХОВНЕ, глас 4: Во гласех воскликнем, / песньми воспоем образ Пречистыя Богородицы / и со первосвятителем Московским и иноком Стефаном / и иными ублажим Деву Всепетую / и взирающе на образ иконы Твоея / чудесы удивляеми и славословие Тебе приносим / яко кадило благовонное и жертву непорочную // приими во спасение душ наших.
Стих: Слыши Дщи и виждь / и приклони ухо Твое.
Приступим человецы ныне / и увидим предлежащую пред нами икону Богоматери / и достойно воспоем Деву Богородицу, / сердцем и душею поклонимся / и чрез Ея чудный образ светом святых заповедей // воплощенного из Нея Христа Бога нашего.
СЛАВА, И НЫНЕ, глас тойже: Кое принесем песнохваление / или киими Тя венцы увязем, Дево Чистая? / Твоего чудеснаго образа явление воспети недоумеем / и высоту Твою в чудесех блистающуюся зрети не терпяще, / но с великим дерзновением, / со страхом и любовию благоговейно лобызающе сице взываем: / О Госпоже Царице и Владычице! / Невещественным огнем и божественным сиянием Твоим, / душу просвети, омраченную страстьми // и к спасению стези направи, Едина Христа рождшая.
ТРОПАРЬ, глас 4: Предстательнице нератная, / о Одигитрие готовая! / Тверския земли и града Москвы красота и слава, / днесь в кров Твой вси прибегаем / и умильно вопием Твоему крепкому заступлению, / просяще избавления от злых наветников православия, / присно борющих нас, / и получити, Богородительнице Чистая, токи неисчерпаемых чудесных исцелений / от Твоея пречудныя иконы / молитвой предстоящего пред Тобою Мирликийского чудотворца Николая // да усердно вси Твое проповемы наше ограждение.
НА УТРЕНИ На Бог Господь: тропарь трижды.
По 1-м стихословии седален:
Днесь красуется древний град Ржев и веселятся христоименитии людие его, имея у себя образ Пречистыя Богоматере, именуемыя Оковецкая и духовно вопиют Ей похвальная, покланяющеся Тебе, благодаряще за множество щедрот Твоих и призывающе на помощь и заступление наше.По 2-м стихословии седален:
Темже молим Тя, Преблагословенная, подати благодать и силу и разумно молитися во страсе и трепете, во спасение наше и обновление.
КАНОН, глас 4. ПЕСНЬ 1
Ирмос: Отверзу уста моя, и наполнятся духа, и слово отрыгну Царице Матери, и явлюся светло торжествуя, и воспою, радуяся, Тоя чудеса.
Припадая раболепно к образу Твоему, Чистая Богородительнице, с многим дерзновением, прося ходатайства Твоего пред Сыном Твоим, Солнцем правды Христом Богом нашим, об избавлении богонравныя и богобоящияся рабы Твоя от наветов вражиих и злых человек.
Прославляя образ Твой святый, о Госпоже Владычице, Благодатная Богородице Дево, взываем из глубины души: приими еже от нас недостойное моление и спаси Твоею державною мощию от обдержащих нас лютых напастей.
Достойно и праведно почитая образ Твой святый, просим Тя несумненную Помощницу нашу от потопления в волнах житейского моря и избавити от кораблекрушения и к тихому невлаемому пристанищу направити.
Богородительнице Чистая, надежда наша и покрове, благоутробным и тихим Твоим оком воззри на люди Твоя, честный образ Твой прославляющих и потщися услышати, исполняющи мольбу рабов Твоих, во еже избавити геенны огненныя.
Слава: Яко к источнику милосердия и милости прибегаем вси в день явления чудныя Твоея иконы, и молимся Твоей матерней благости подати нам умиление и очищение наших непотребных деяний и лукавых помышлений.
И ныне: Темже, Пречистая, Мати сущи живота, ко образу Твоему притекающе, молимся: не презри рабов Твоих в пучинах греховных валяющихся, и исцели ны от лютых и растленных ран: ибо Врача родила еси, в милости богатого, Христа Бога нашего.
ПЕСНЬ 3 Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе венцев славы сподоби.
Имеющи величайшее дерзновение, Чистая и Неискусобрачная Богородительнице, к Сыну Твоему, настоящего искушения нас избавити, разоряюще советы врагов православия, присно борющих нас.
Днесь лицы вышних чинов, мучеников и праведников со апостолы, пророк и преподобных составити вкупе с нами достойное хвалебное песнопение Божией Матери, да умолит Господа избавити нас вашими молитвами, от дерзости лукавых демонов, страстьми нас борящих и оградит миром суетное житие наше.
Прибегаем Ти, Богородительнице, и молимся из глубины сердца нашего, буди нам упование и крепкое заступление, буди нам прибежище и ограждение, и утиши гнев праведнодвижимый, належащей земли.
Предстоит днесь лик святых иже в земли Тверстей просиявшей пред Тобою, о Мати всяческих Творца, молящихся о мире и во еже избавитися нам от враг видимых и невидимых.
Слава: К Пречистому Твоему образу , Дево Мати Всенепорочная, прибегаем и со умилением вопием: радуйся, Благодатная, Тобою бо разрешится осуждения прадедняя клятва.
И ныне: Твой образ, Дево Всечестная, яко нерушимую стену имуще грешнии: не презри нас предстоящих и молящихся, и не посрами наша приносимыя моления.
Седален, глас 4.
От теплоты веры, надежды, любви, вси мы взываем Ти, Богородительнице Всепетая, недостойными нашими усты и злыми помыслы сердца: спаси и помилуй нас, погруженных многими грехами; ущедри отчаявшихся в надежде на милосердие Твоего Сына: взываем Ти спасаеми: радуйся, Дево, христиан похвало и подающим очищение Бога Слова воплошщи.
ПЕСНЬ 4. Ирмос: Седяй в славе на Престоле Божества во облаце легце, прииде бо Иисус Пребожественный нетленною дланию и спасе зовущия: слава, Христе, силе Твоей.
О Преславная Царице, Мати Христа Бога нашего, не забуди нас предстоящих пред пречистым Твоим образом и милостивно, покрый матерним попечением молитвами ради всех святых земли Тверския, наших сродников по плоти, и сохрани всех верою почитающих Тя, и избави огня и прочих мучений в день судный.
Очисти наша прегрешения и прочая беззакония, содеянныя нами в сем житии, Единородне Сыне Божий, молитвами без семене рождшия Тя и всех святых в земле Российстей просиявших, ибо Ты, ради нас, Слове Божий, воплотился еси и честную кровь пролиял еси.
Печальни есмы от соборища лукавых неправедно борющих Святую Русь православную, Богоневесто: но сих низложи, якоже древле Симона волхва.
Печаль нашу на радость преложи, Господи Иисусе Христе Боже, и умилосердися Богородицы ради, во еже оградити нас от нападения хищных волков в овечьей шкуре.
Слава: Во образе Своем Ты явилася еси Всеблагой и Теплой Заступницей нас грешных и смиренных, Богородительнице Пречистая Владычице: просим Тя, спасай от бед, и скорбей, и страстей настояния, рабы Твоя.
И ныне: Дево Всечистая, яви во иконе Твоей неизреченное чудо всем нечествующим Тя, злобы ересь и расколов низложи и избави молитвами Твоими плотское мудрование и тлетворных ветров человеческого суесловия и лютых нападений вражиих.
ПЕСНЬ 5. Ирмос: Ужасошася всяческая о Божественней славе Твоей, Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
Призывающих Тя, Царица наша Богородица, от души неложно, в различных болезнех и бедах лютых, скоро услыши, присно избавляющи всех притекающих к Твоему образу, молитвами Твоими.
Да славословится на земли препетое имя Твое, Богородице, иже из Тебе возсияв, державную надежду и стену Тя дарова для нашего спасения: Тобою бо, Всечистая, всякое дыхание притекает.
Иже в молитвах бодрую и неусыпающую Богородицу вси болезнью и скорбью одержимыя призываем, взывающе: О, Владычице, помози нам избавитися от одержащих болезнью рабы Твоя пред иконою Твоею колена своя преклоняющих, яко по Бозе не имамы надежды и заступления.
Приими, в день прославления образа Твоего, Мати, Дево Чистая, препетая Отроковице, песнь от устен наших недостойных и многопрегрешивших, воздавающе благодать неоскудныя Твоея милости, надеющимся на Твою материнскую любовь: и испроси у Великодаровитого Бога мир даровати Церкви нашей и всем нам велию милость.
Слава: Ты вся веси нашего ума гнилость и непостоянство, Ты веси и душ наших болезни и плоти неможение, темже в надежде на милосердие и благости Твоея, прошу, Владычице, человеколюбия улучити, а чрез сие и силу страхом и любовию творити же и деяти оправдания Христова.
И ныне: Душевныя наша руце простираем Тебе, Чистая и Благословенная, Мати Божия, молимся со слезами, Пречистою Твоею рукою изгнати враги, на ны востающия, да познают и уразумеют вси противящиеся истине, яко на Тя упование возложихом.
ПЕСНЬ 6. Ирмос: Божественное сие и всечестное совершающе празднество, Богомудрии, Богоматере, приидите руками восплещим, от Нея рождшагося Бога славим.
Ты еси всем надежда и помощь, Ты еси радость и покров, и прибежище, Ты еси крепость наша. Похвала и радование, Пречистая Приснодево, Мати Живота, к Тебе убо прибегаем, Тебя убо просим, Твою помощь низпослати всем поющим Тя и прославляющим Твой чудный образ, егоже явила еси в пределах Тверскаго края.
Да не осудиши нас беспечных и нерадивых в делании заповедей Господа и Бога нашего, но Твоим благоутробием помилуй и спаси нас, Владычице, верою поклоняющимся пречистому образу Твоему.
В дни явления Твоего образа вси приходяще страждущие к иконе получали исцеления, и ныне, о Пресвятая Дево, Мати Бога нашего, моли Сына Твоего даровати исцеление души и телу, и очищение наших греховных помышлений, верою и упованием притекающих Ти.
Виждь, Благая Пречистая и Приснодево Мария, души нашея озлобления и болезни вскоре приими, да Тя непрестанно и немолчно славим.
Слава: Поем Тя, благословенную в женах и молим: упраздни враги Святейшия Церкви Христа Бога нашего и попали их, ибо Ты еси Огненосна и Богоприемна Купина.
И ныне: Песнословим Тя, Всесвятая и Присноблаженная и достодолжно почитаем образ Твой святый прося , поюще: души благоприменение и телеси здравие.
КОНДАК, глас 4. Яко стену необориму, источник милосердия, / упование земным и заступление, / Мати всяческих Творца Всесветлая, / Тя стяжавши, раби Твои Богоотроковице, / на мольбу нашу ныне умилосердися / иже от врагов православия насилование скоро и невозвратно разори / мечем божественныя Твоея и святителя Николая молитвами / и не остави прославляющия люди и стада Твоя погибнути, / яко вся возможно Тебе, Чистая / Богородице Неискусобрачная и Мати Зиждителя сущи и Всепетая, // да усердно вси Твое проповемы наше ограждение.
Икос. Сошедшимся днесь в храме сем, достойно и праведно прославим Всемирную Славу, Небо и Храм Божества, Пресвятую Деву и православно исповедающе образ Ея святый явленный в пределах Оковецких, со благоговением вопиюще: радуйся, Тверския земли Отрадо и Утешение; радуйся, Горо мысленная; радуйся, неизреченное Чистото девства Твоего; радуйся, Прибежище и Дверь спасения к жизни вводящи Дево Богомати; радуйся, болящим врачевство и отчаянным душам спасение; радуйся, Едина Пречистая Дево Мати, чистотою ангелы превозшедшая; радуйся, возведение верных, православных людей, Богородице, воистину, уповающих на Тя, молитвами Твоими избавляющи нас от бед всяческих и от безбожных враг; радуйся, Благодатная Богородице Дево, Храм и священное жилище Слова сущи и наше ограждение.
ПЕСНЬ 7 Ирмос: Не послужиша твари Богомудрии, паче Создавшаго, но огненное прещение мужески поправше, радовахуся, поюще: препетый отцев Господь и Бог благословен еси.
Тя чудесный источник исцелений именуем, Пречистая, всех нас осквернившихся, чистотою омый, и уясни Дево, молитвами Твоих окроплений.
Приклонися к мольбам нашим, Владычице, и иссуши молитвами Твоими возмущающий поток страстей душу нашу и лукавыя помыслы потреби.
Моли Царица наша Богородице, Единородного Сына Божия, да дарует Он нам мирная и премирная благая и невредны сохранит от волков губящих нас.
Благословя, благословляю Тя, Пречистая, величая, величаю Тя Честнейшую Херувим и Славнейшую без сравнения Серафим, благослови и нас поющих Тя и почитающих образ Твой святый.
Слава: Тебе, Дево, величие сотвори Господь и показа Тя Матерь и Ходатаицу живота и святую икону Твою изображенную с младенцем Христом и предстоящим Ти святителем Николаем Чудотворцем, обретенную на берегу реки Вырешки деревенскими конокрадами даде да постыдятся от силы Твоея вси противящиеся благости отцев Бога, благословенного во веки.
И ныне: Се покровительствуемый тобою град Ржев и весь Тверский край, светлый праздник Пречистого образа Твоего всечестне почитает и яко истиннии поклонницы, не нравом плотским, но духом и истиною, Тебе Богородицу именуют, поющи: отцев Бога, благословенного во веки.
ПЕСНЬ 8 Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки.
Ты, Царица Небесная, изволила еси во граде Москве, идеже митрополит, царь и вси людие припадающе поклонились Твоей чудной иконе с верою и любовию Богородицу Чистую Тя славящия.
Се время наста нашего уныния, востани, Пресвятая Богородице, и помози нам во еже избавитися от творящих расколы и разделения.
Неоскудную благодать имущи, Мати Безневестная в Пречистем Твоем образе, к Тебе убо прибегаем, Тебя убо просим сохранити Святую Церковь, юже стяжал честною своею кровию, родившийся из Тебя Сын Божий.
От всяких распрей и расколов и разделений соблюди, Богородице, Упование наше: и яко светоносный облак Божий просвети всех светом истинного богопознания, молимся.
Слава: Ныне вси изобильно исполнимся божественного света от Бога данной Ти благодати, источающейся от Пречистого образа Твоего, ибо Ты, избранная Отроковице, явилася еси Дверь, еюже пройде Бог во просвещение, освящение и спасение наше.
И ныне: Веруем и уповаем Богоблаженная Царице, Дево Марие Богородице, что никтоже притекающий к Тебе не отходит посрамлен, но смиренно просит облагодатити и во смирении приемлет дарования к полезному прошению.
ПЕСНЬ 9 Ирмос: Всяк земнородный да взыграется, Духом просвещаем, да торжествует же Бесплотных умом естество, почитающее священное торжество Богоматере, и да вопиет: радуйся Всеблаженная Богородице, Чистая Приснодево.
Спаси нас, Чистая, погибаем от множества прегрешений наших и избави от человеческия клеветы и суетнаго совета их, да сохраним заповеди Господа и Бога нашего.
Едина на земли и в море воистину явилася еси надежда и заступление всем с несумненною душею и чистым сердцем прибегающим к Тебе.
Во гласех благодарственных присно прославляем Твой образ, явленный нам, да вси прибегающие с верою, Дево Богородительнице, имеем покров Твой от треволнений страстей обуреваемых всегда в мори жития нашего.
Чистая Дево, Богообрадованная, се прихожду Ти, со страхом многим и любовию, ведая крепость многия молитвы Твоея ибо Твоя матерняя мольба к Сыну милосердием приклоняется.
Слава: В годину испытаний Отечества нашего приими лики Архангел и множество небесных сил Зиждителя нашего, апостол же и пророк соборы, мученики и преподобные и священномученики: и молитву сотвори, за нас и Русь нашу к Богу.
И ныне: И ныне преклоняем колена сердца нашего пред Пречистым образом Твоим, Боголюбивая Владычице, ангелов украшение, святых Тверских и всея земли нашея слава, с ними возносим молитву во еже обрести нам милость и возмощи стати противу всем кознем супостата нашего спасения.
Светилен.
Христе, Свете Истинный, просвети песнословящих Пречистый образ Богоматери и сотвори нас, яко чада света Твоего богоразумия ходити во свете заповедей Твоих, да егда пришедши во славе Своей с рождшею Тя, спасемся предстательством Преблагословенныя и сообразнии будем светлейшему солнца образу Твоея славы.
СТИХИРЫ НА ХВАЛИТЕХ, глас 4. Приидите вернии / и возрадуемся Всецарице Богородице / и воспоим яко Царя Царствующих и Господа Господствующих Матерь, / усердно взывающе: о Владычице, / буди несокрушимой крепостью Державе нашей многострадальней / и православному воинству ея, // подающи им множество щедрот и велию милость.
Приидите в нарочитый сей день праздника нашего, / чистым сердцем и бренными устами / песнь благодарения составити / и взирающе на всечестный образ Ея, / просяще молитися за нас пред Престолом Триединого Бога / и святою иконою Своею избавити от бед, // во спасение душ наших.
Всечестне празднующе сей всечестный Богоматере праздник, / предочистим себе воздержанием от всех злых дел, / и нескверными устами и чистым сердцем прославим, / посетившую Тверскую землю чудесною Своею иконою, Богородицу, / и прося, преклоньше колена сердец наших, / быти в бури пристанище, в печалех радосте, / и веселие, и в недузех врачевание, // во спасение душ наших.
Приидите, воспоем Господеви, / благодеющему нам, явлением чудеснаго образа Пречистыя Матери / и сошедшеся согласно воспоим благодеяния и милосердия / имиже Господь, хвалимый по множеству величествия от небесных сил, / в Тверских пределах преславно прослави Матерь Свою: / сего ради благодарим Просветителя и Спасителя душ наших / и, благодаряще, воззовем: спаси нас Господи / во славу Имени Твоего и во спасение Твоего достояния // молитвами ради Богородицы.
СЛАВА, глас тойже: В благознаменательный день благоволения Божия, / егда призре Господь на смирение наше, / недостойных рабов Своих, / яви нам в пределах Тверския земли велие знамение Своего о нас промысла, / ибо к нам, к неописанной нашей радости прииде Мати Господа нашего / во образе честныя Ея иконы; / сего ради к благохвалению пришествия Твоего чудеснаго образа, празднующим, / исходатайствуй благодать от Самого Святых Святейшего, / по достоянию воспевати Тебе: // Благословенная в женах и Благословенный Плод Чрева Твоего.
И НЫНЕ, глас тойже: Богородице Дево, / упование всех ненадеющихся, / покрый и соблюди прибегающим к Ти / умиленною душею и сокрушенным сердцем, / да помилует Всевышний Владыка Господь, пришедый спасти мир, / ради всеблагому о нас промыслу, / сохраняя пределы земли Тверския / и нашу православную Российскую державу и люди ея, / да, в мире и тишине, и благочестии живуще, // почитающе непрестанно с рождшею Тя, Господа.
ТРОПАРЬ, глас 4: Предстательнице нератная, / о Одигитрие готовая! / Тверския земли и града Москвы красота и слава, / днесь в кров Твой вси прибегаем / и умильно вопием Твоему крепкому заступлению, / просяще избавления от злых наветников православия, / присно борющих нас, / и получити, Богородительнице Чистая, токи неисчерпаемых чудесных исцелений / от Твоея пречудныя иконы / молитвой предстоящего пред Тобою Мирликийского чудотворца Николая // да усердно вси Твое проповемы наше ограждение.
КОНДАК, глас 4. Яко стену необориму, источник милосердия, / упование земным и заступление, / Мати всяческих Творца Всесветлая, / Тя стяжавши, раби Твои Богоотроковице, / на мольбу нашу ныне умилосердися / иже от врагов православия насилование скоро и невозвратно разори / мечем божественныя Твоея и святителя Николая молитвами / и не остави прославляющия люди и стада Твоя погибнути, / яко вся возможно Тебе, Чистая / Богородице Неискусобрачная и Мати Зиждителя сущи и Всепетая, // да усердно вси Твое проповемы наше ограждение.
ВЕЛИЧАНИЕ. Величаем Тя, Пресвятая Дево, / и чтим образ Твой святый, от него же истекает благодатная помощь / всем, с верою притекающим к нему.
МОЛИТВА КО ПРЕСВЯТЕЙ БОГОРОДИЦЕ
пред иконою Ея ОКОВЕЦКАЯО Пречистая наша Всеблагословенная и Всемощная Госпоже Владычице и Всеблагая Богородице Одигитрие, благодарим Тя, яко сподобила еси нас великой Своей милости, творити пресветлое торжество Честнаго Твоего Образа с предстоящим Ти святителем и чудотворцем Николаем, явленнаго благоволением Твоим в светозарном сиянии и приосененною многими чудесы на брегу реки Пыршни черноризцу Стефану и иже пришедшим с ним народом в пределах Оковецких, и приносити прилежное нашими недостойными устнами моление Честному Животворящему Кресту, всех святых Святейшему Слову и Тебе Матери Всемилостиваго и Великодаровитого Бога нашего. Днесь от усердия нашего раболепно с трепетом, якоже рече псалмопевец Давид: «’’«Работайте Господеви со страхом и радуйтеся Ему с трепетом»’’ , пред Святою иконою Твоею припадая прося напоить наше немощное человеческое естество живительными и цельбоносными струями непрестанных молитв Твоих и очиститися от всякой скверны плоти и духа, совершая святыню в страсе Божиим (2 кор. 2, 1), ибо вемы, яко много может молитва Твоя пред Престолом Триединаго Бога. Се мы, смиренныя и грешныя, обремененнии игом тяжких многих беззаконий наших, во умилении глубоцем просим подать исцеление слепым, хромым, глухим и другим страждущим, одержимыми многими и различными скорбями и недугами и избавити от праведнаго наказания прежде времене общаго воздаяния в день страшнаго суда Единородного Сына Божия, ибо мы вемы, яко ничтоже возможно ходатайству Твоему, аще токмо восхощеши. Темже просим утвердить нашу веру праву, Церкве Русстей мир, тишину и благостроение, укрепить православныя люди в настоящую годину испытания и избавить от душепагубных ересей, расколов и разделений, сподобить соблюсти всех в единомыслии и да познают неверующии и непокланяющиися Честному Образу Твоему, яко Ты еси несравненное наше Украшение, Слава, Небесный и Державный Покров, скорая Помощница, непостыдная Заступница и постоянная Ходатаица у Единого Ходатая Бога и человеков Иисуса Христа. Яко Тя ради подобает всякое благодарение Всесильному и Всеблагому Содетелю, Господу нашему Иисусу Христу купно со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.