На малой вечерне: На «Господи воззвах», стихиры глас 1:
Помощниче иноцев многочудный, сотрудниче Христов преподобный, моли за нас Бога и Спаса нашего, да прославим Его достойно, и тебя, отче Ниле, возвеличим, поминая твоя честныя подвизи, имиже на Селигере езере прославился еси, днесь же чтим мощей твоих славное перенесение.Славы земныя бегая, взыскуя токмо Небеснаго Царствия, тя, Отче Ниле, яко образ кротости и смирения имамы, и яко мерило честное воздержания и молитвы, и яко сосуд исполненный даров Божия Духа, иже изливаются на нас от раки мощей твоих.
Друже всех во Христе спасения взыскующих, отче Ниле чудотворче, прими и нас к тебе ныне прибегающих. Днесь, после гонений лютых на Церковь, возведенных от безумных безбожников, просвети нас светом твоих о нас молитв у престола Божия.
Слава, глас тойже:
Чем достойно тя, преподобне, возхвалим? Что ти пренесем в день твоего во обитель селигерскую возвращения? Приими, отче, наше покаяние всецелое за грехи отцев заблудших в хитросплетениях диавольских и буди днесь пред Христом ходатай за Святую Русь, да непостыдимся.И ныне: Богородичен.
На стиховне стихиры, глас 6:
Благодати честное вместилище, и источниче исцелений неоскудевающий, ныне почитаем раку мощей твоих, и славное ея перенесение, из града Осташков в обитель Богоявленскую, твоими молитвами сберегаемую от всякия скорби и печали.
Стих: Честна пред Господем смерть преподобных Его.
Язык русский хвалит тя, отче, и блажит, яко своего пред Богом хадатая, иже в годы Грознаго царя подвизи свершал еси, тебе ли боятися богоборцев века нынешняго? Зане молим тя теплою молитвою, даждь и нам избавление от всякаго земнаго страхования, и да умножим страх пред Царем Небесным, тя имея крепкаго заступника.
Стих: Восхвалятся преподобнии во славе, и возрадуются на ложах своих:
Сирым заступление крепкое, странным пристанище и упокоение, плавающим и путником путевождь, чуткий на молитву и скорый на умоление, неослабевай в своем о нас предстательстве у престола Небеснаго Владыки.
Слава, глас тойже:
Днесь ликует обитель твоя, отче! Радуйся и ты у престола Божия стоящий, храм твой паки полон дыхания молитвеннаго, села процвели кринами благоуханными, светло торжествуя чудотворных мощей твоих возвращение, исполняющих остров Столобенский многомощныя благодати.И ныне:
Преблагословенная Богородице Дево, пози нам, яко роду христианскому Заступница молитвами усерднаго богомольца Твоего Нила, иже в келии благоговейно почитал еси образ Твой честный, яко безценное сокровище, и спаси души наша.
На велицей вечерне: На «Господи воззвах», стихиры глас 8:
Ныне наста празнество и веселие, Церковь Русская чтит твое, отче Ниле, возвращение в место, идеже подвизался еси, егоже указа ти сам Господь, ты же являя образ послушания, на острове пустыннем водворился еси, и днесь верность Богу соблюдаяй, честными мощами своими остров сей украшаешь.
Преславне и достохвальне отче наш Ниле, пустыню Селигера езера просветил еси, подвигома молитвы и пощения, и ко Христу любве пламенной в сердце, еяже в нем непристанно хранил еси, и ныне просвети пустыню сердец наших.
Поста и молитвы искусниче преизрядный явился еси и на отгнание супостата, чающаго погубити человеков в геене огненной споспешник христианом, днесь покрый нас заступлением молитвенным, к раце многоцелебных твоих мощей благоговейно притекающих.
Слава, глас тойже:
Семя слова Божия, падшее в землю добрую души твоея, струями слез своих напоил еси, постом и молитвой согрел еси, послушанием укрепил еси, любовию к Спасителю возлилеял еси, милостью к кающимся воспитал еси, заступлением к твоей помощи притекающим благословил еси; ныне же видим его, яко чудоносное древо, в подобие эдемскаго древа жизни произросшее из усердия твоего, отче наш Ниле, обитель святую твою, в нейже после изгнания невольнаго паки вселился еси, радость всем чтущим тя подавая.И ныне:, глас 8:
Киими чистыми устнами ублажим Тя Богородицу, честнейшую херувим, и святейшую серафим, ангел и святых славнейшую, престол Царя небеснаго неполебимый, храмину, в Нейже вселися Бог, врата непроходныя, ихже Единый пройде даруя спасение миру, освящение естества, подающую верным велию милость.Вход. Прокимен дне и чтения 3.
Премудрости Соломоновы гл. 5,3 и 4, писаны в минеи преподобному единому.
На литии стихиры, глас 1:
Чудеса преизобильно мощи твоя честныя источают, цельбы многия чтущим тя, отче преподобне, подавая, и благоухания духовнаго все окрест себя изрядно наполняя; днесь патриарх со епископы православными благочестно святыню сию во обитель твою, иже на острове Селигера езера, путем водным препровождают, благодатию осеняя лепоту естества Богом сотвореннаго.
Бдением и молитвою непреистанной украшенный, подобием столпником в сониях от лежания себя двема костылиями удерживал еси, темже во изнурении плоти зело преуспев, неприступнаго умнаго света достигл еси, иноком же столобенским по отшествие твоем во обители небесныя нетленные чудотворящие мощи оставил еси, преображение естества из тлена к безсмертному нетлению знаменуя.
Слава:
Образ кротости и мерило незлобия, ярость разбойничию смирением посрамил еси, слепоту наказующую милостиво уврачевал еси, ныне иноком уроки благочестия показуя, молим тя потреби ярость мира сего, умоляя Господа и Матерь Его Пречистую, спасти землю Русскую.И ныне:, глас 4:
Владычице усердная, миру благая заступница, укрепи верно славящих Тя, Тя молим предстательницу нашу, не остави погибнути до конца отечество наше, но ускори изъяти нас от настоящего гнева и скорби, тя бо яко небесное ограждение крепкое имамы.На стиховне стихиры, глас 2:
Взем на раму иго Господне, отложил еси попечение о земном; именем Христовым полчища бесовския побеждая и образ жития непорочнаго являя верным.
Стих: Честна пред Господем смерть преподобных Его.
Ангел земный и житель града небеснаго, явился еси яко дом Пресвятаго Духа, благословляяй и освящаяй пределы Селигера езера, и заступление на супостатов подаваяй чтущим тя.
Стих: Восхвалятся преподобнии во славе, и возрадуются на ложах своих:
Образ нестяжания инокам являя, милостиво подаеши молящим тя о помощи благодатную силу, прославляя прославившего тя Господа.
Слава, глас 6:
Радуйся обитель иноков честных, радуйся храме благословенный, радуйся и ты отче Ниле, яко ковчег Завета возвращенный из плена филистимскаго, ныне паки водворяешися под кров свой, и мощи твои токи благодати окрест изливают, тя являя яко великаго селигерских иноков сомолитвеника, заступниче наш и преславный чудотворче.И ныне, богородичен:
Богородице, ты еси лоза истинная...Тропарь, глас 4:
Яко светильник всесветел явился еси во острове Селигера езера, преподобне отче Ниле; ты бо Крест Христов от юности своея на рамо взем, усердно тому последовал еси, чистотою Богови приближився, отонудуже и чудес дарование обогатился еси. Тем и мы притекающе к раце мощей твоих умильно глаголем: отче преподобне, моли Христа Бога, спастися душам нашим.
На утрени: на Бог Господь, тропарь глас 4: см. выше.
По 1-й кафизме Седален:
Ангелом собеседниче, и демонов злая пагуба, легкий в одолении супостатов невидимых, отче Ниле преподобне, избави нас от всякия напасти, к раке твоей с любовию притекающих.
Слава и ныне:
Упование непостыдное верно чтущих Тя, паче естества Спаса рождшая, милостиво страсти упокоеваеши в сердцах обуреваемых, надежду подавая ненадемым.По 2-й кафизме Седален:
Отче преподобне Ниле, от юности к воздержанию прилежал еси, Небесному Царю изрядно угождая, мирская нивочто вменял еси присно, выну имея пред собою Христа Бога и Матерь Его Всемилостивую, чтимую ныне на иконе Селигерской, и ныне подаеши нам твое заступление.
Слава и ныне:
Преславное о нас заступление в Тебе Причистая Дева стяжахом, и исполнение древних пророчеств в Сыне Твоем обретохом, благолепно вопием Ти: Радуйся Преблаженная, небесных воинств Превысшая.Полиелей: Хвалите имя Господне.
Величание: общее преподобному («Ублажаем...»)
По полиелее седален:
Во мрежи постничества и молитвы благодать Божию уловляя, сам отче наш Ниле, сподобился еси просияти благодатию, темже чудотворныя мощи твоея токи чудес источают; ныне достойное приемше поклонение, яко почтенный от патриарха и многия епископы честию и славою, в место своих конечных подвигов исходиши, землю селигерскую благословляяй.
Слава и ныне:
Яко необоримую стену Тя, Пречистая, имамы, поспеши на помощь нам страждущим, ускори к покаянию заблудших, землю русскую присно от бед спасающая.Степенна, 1-й антифон 4-го гласа: от юности моея:
Прокимен, глас 4: Честна пред Господем смерть преподобных Его.
Стих: Что воздам Господеви о всех, яже воздаде ми.
Евангелие: Лука 24 зач.По 50-м псалме, Слава: Молитвами преподобнаго отца нашего Нила, Милостиве, очисти множество согрешений наших.
И ныне: Молитвами Богородицы, Милостиве, очисти множество согрешений наших.Помилуй мя Боже: и стихира сия:
Радуйся обитель иноков честных, радуйся храме благословенный, радуйся и ты отче Ниле, яко ковчег Завета возвращенный из плена филистимскаго, ныне паки водворяешися еси под кров свой, мощи твои токи благодати окрест изливают, тя являя яко великаго селигерских иноков сомолитвеника, заступниче наш и преславный чудотворче.Канон, глас 8
Песнь 1
Ирмос: Воду прошед яко сушу, и египетскаго зла избежав, израильтянин вопияше: Избавителю и Богу нашему поим.
Древним отцам подражая, подвигами многими преукрашен, отче преподобне, укрепи немощное наше племя, днесь стужаемое от врагов православныя веры.
Отче треблаженне, помози нам в море страстей углебающих, умоляя Христа Бога низпослати православным людем благодатное укрепление, спасаемии да не погибнем.
Наста ныне праднество всерадостное, яко ты, отче наш и затупниче, Ниле в место подвигов честных водворяешся, нам, блудным чадом Божиим, показуя путь возвращения в послушание Церкви и Отцу Небесному.
Богородичен: Боляща исцели душею же и телом, Владычице, раба Твоего блаженнаго Нила молением: Тебе бо Предстательницу вси сущии в печалех стяжахом, яко рождшую Спасение наше.
Песнь 3
Ирмос: Утверждей в начале небеса разумом, и землю на водах основавый, на камени мя, Христе, заповедей Твоих утверди, яко несть свят паче Тебе, Едине Человеколюбче.
На камени веры крепцей стояяй посреде моря страстей мира, отражал еси нахождения бесовския, яко злыя волны, находящия на малый остров твой посреде Селигера езера, на него днесь возвратился еси, отче.
Заповедь ни единую не забых, отче Ниле, ты и от закона и в благодати Божией прославлен бых, тмы жаждущих утешения и совета вкруг себя собиряя, и ныне не отврати ны от благодати святых молитв твоих.
Яко светильник земли Русския, просвещаеши нас прибегнути к подвигом, Единому Подвигоположнику Христу подражая, отметая немощь естества, и уповая на помощь Божией благодати.
Богородичен: Источаеши исцелением струи болящим, Дево, всюду: Тя бо источник показа исцелений, Владычице, Иже милости Господь, из Тебе рождейся паче ума.
Седален:
Возсия благодать твоих дивных молитв, отче наш Ниле, яко источник благодатныя влаги, сущих в духовной жажде напояющий, и нас сподоби припасти к чудотворной драгоценной раце честных мощей твоих, яко к сему благому источнику.Песнь 4
Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету просветив. Тем с пророком Аввакумом зову ти: силе Твоей слава, Человеколюбче.
Постников похвало и иноцев украшение, отче Ниле, праздности всегда бегаяй, и нас от праздословия и ленности избави, подвигая к молитве и трезвению.
Радости жития временнаго нивочто вменил еси, паче сего радость благодати Божией обретая, темже и во обители небесныя вселился еси, и жизнь вечную наследствова.
Ангел земный и человек небесный, отче Ниле преподобне, показался еси, яко плоды духовные Христу принесл еси, темже и ныне молитву у престола Божия о нас грешных возносиши.
Богородичен: Покров, и заступление, и прибежище буди ми, Дево, рабу Твоему, исцели мя от безмерных зол, воспевати, пречистая: слава Рождеству Твоему.
Песнь 5
Ирмос: Утренюет дух мой в Тебе, Боже, от Отца рожденному неизреченно, и воздвигшему рог спасения нам.
Веждам своим не дал еси дремания, ум свой к молитве выну побуждая, отче Ниле блаженне, темже и блаженства райскаго на земли вкусил еси, и днесь в райских обителех со святыми пребываеши, восписуйяй славу Всеблагому Спасителю.
Аще и в пустыню телесно вселился еси, духом окрест тя, отче преподобне, крин благоуханный процвете, подобне и ныне благоуханием храм наполняеши, в немже мощи честные твоя почивают, и ароматы духовными сердца наша.
Чистое житие пожив, благодатию место своих подвигов от всякия скверны очистил еси, днесь паки очисти остров свой, отче, от духа безбожия и злобы.
Богородичен: Не престай молящи, Егоже родила еси, Богоневесто, яко Спаса и Владыку, разрешение ми подати скорбей и болезней облегчение, яко да прииму прощение, песнословя Тя во веки.
Песнь 6
Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже, возведи мя.
Благодати Святаго Духа преисполненный и ангелу житием уподобивыйся, ныне со ангелы, яко с духи чистыми ангельские песни приносишь Богу, отче преподобне.
В молитвах чистых слезами омывал еси постелю свою, яко подножие Престола Небеснаго Владыки, ныне радостью чистою радуешися, зря свет славы Божией и молиши Спаса за весь мир и за нас, зде у раки твоей пребывающих.
Телесе умертвляя для жизни временныя, духом прорастал еси в Живот вечный, нам показуя образ усерднаго прилежания в подвигах спасения ради.
Богородичен: Твою помощь даждь ми и избави мя от бед, и скорбей, и прегрешений моих, Яже всех рождши Избавление.
Кондак,глас 8: Отечества, преподобне, удалився,/ в пустыню вселился еси,/ и на остров Селигера езера возшед, жестоко житие показал еси,/ и многих добродетельми удивив,/ дарования чудес от Христа приял еси./ Поминай нас, чтущих память твою, да зовем ти:/ радуйся Ниле, отче наш.
Икос: Возлюбив, преподобне, Христовы Божественныя заповеди/ и возненавидев мира сего наслаждение,/ притекл еси усердно к Тому/ и был еси светильник, просвещаяй концы блистанием духовным./ Тем, припадая, молю ти:/ просвети ми очи сердечныя воспети твоя подвиги,/ пощение, бдение, слезы, болезни, изнурение тела/ блаженныя ради будущия жизни,/ еяже ныне наслаждаяся, моли непристанно о всех нас.
Песнь 7
Ирмос: Божия снисхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси, Боже отец наших.
Днесь честные епископи православныя с патриархом раку чудотворных мощей твоих, отче Ниле, во обитель селигерскую переносят, благолепно поя: благословен еси Боже отец наших.
Всякий навет вражеский отражаяй, отче, уповал еси, яко претерпевый до конца той спасен будет, темже и благодарил Спаса о всяком стужении, поя: благословен еси Боже отец наших.
Иноцев словесное стадо, окрест себя собраше, поучал в терпении и смирении соблюдати всякую заповедь Христову, паче же отвержения себе и ношение креста, поя: благословен еси Боже отец наших.
Богородичен: Обощрены болезни ранам моим от безмерных моих прегрешений, Владычица, ведут в смерть душевшую и телесную, но исхити, яко сильна, всяких скорбей и недуг.
Песнь 8
Ирмос: Покрываяй водами превыспренняя Своя, Полагаяй морю предел песок, и Содержай вся, Тя поет солнце, Тя славит луна, Тебе приносит песнь вся тварь, яко Содетелю всех во веки.
Рождества своего никомуже сказав, два места Отечества твоего имамы несумненныя: овое есть остров уединенный Селигера езера, идеже днесь паки вселился еси, овое же Царство Небесное Отца всех Бога, Егоже пойте дела и превозносите во вся веки.
В пыстыню богозданную вселился еси, преподобне, таможе храм Богоявления воздвигл еси, во еже достойно воспевати Господа нашего дела и превозносити Его во веки.
Днесь паки красуется пустыня твоя, отче Ниле, мощи чудотворныя обретши, учеников же твоих радостное Христово воинство веселящеся вопиет: Бога нашего пойте дела и превозносите Его во веки.
Богородичен: Светильник Света Трисолнечнаго сущи, зарею благоутробия Твоего тьму отъими прегрешений моих, Богородительнице, избавление недужных болезней подающи верою превозносящему пречистое Твое Рождество.
Песнь 9
Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу, ангелов и человек чиноначалия величают.
Доброты мирския призрев, сподобился еси соблюсти в душе доброты Небесныя, яко безценныя дары Духа Божия в сердце своем слагая, Пречистую Богоматерь имея в том себе порукою.
Благодати источник неоскудевающий, раку честных мощей твоих, отче преподобне, днесь благочестно величаем.
Избранный Господом сосуд благодати, днесь водворяется на место свое, отче Ниле, моли Христа Бога, да возвернет и народ наш к исповеданию веры святоотеческия, во еже просияла Святая Русь пред лицем всех языков, да не рекут нам: где есть Бог их?
Богородичен: Ты еси верным похвала, Безневестная, Ты заступление и священное прибежище христианом: к Сыну бо Своему и Богу мольбы носиши, Всенепорочная, и от бед спасаеши верою и любовию Богородицу Чистою Тя воспевающих и величающих.
Светилен: Храм Богу воздвигл еси, отче Ниле преподобне, сердечный храм своим богомольным духом являя, яко дивен Бог воистину во святых своих, тем же и мы тя усердно славим ныне, поспевая твоих мощей честное перенесение.
Слава и ныне: Богородичен:
Радость неизреченную рождши, Господа, радости Небесныя причастников всех нас сотвори, Тебе почитающих, Пречистая, и от души вопиющих Ти: не забуди Твоя рабы, Благословенная Марие.На хвалитех стихиры, на 4:
Оставив земная, возжелал еси небеснаго, и Божией дланию в предуготовленное тебе место посреде вод езерных вселился еси, просвещая к благочестному прилежанию всякого к тебе притекающаго, иноков усердных наставниче, блудных обличение, татем наказание, кающимся милость; тем же и ныне, отче преподобне, наказуй землю русскую своим премудрым заступлением.
Пучину опасную страстей укротив смирением, послушлив был Благому Создателю своему совершенно; покаяния неподдельнаго проповедниче, оконце пред блудником затворяя; не отвратися от нас, отче преподобне, чающих твоего крепкаго заступления, кающихся днесь о грехах своих слезно.
Рыбарей селигерских от злых ветров заступниче, и чающим Богопознания собеседниче, отче наш Ниле преподобне, ныне честью достойно украшенный, и патриаршим посещением отмеченный, благодатную руку незримо простираеши к чающим твоего благаго заступления.
Слава:
Постника празднество торжествуем постнически, убежим страти греховныя, призрим дух стяжания и воздвигнем щит молитвенный духов злобы поднебесныя лукавствия отражая; отче Ниле преподобне, буди нам в том, учитель и победоносный начальник.И ныне:
Достостойно Тя блажит человеческий род, ты бо еси на враги оружие необоримое всем на тя уповающим, в бедах помощница и в скорбех утешительница, тя славословят нищие и убогие, сироты и вдовы, яко избрала еси себе в удел землю русскую, еяже возлюби Бог, украсив яко звездами сонмом преподобных, иже тя заступницу усердную нашу воспевают: радуйся рода христианского спасение.Славословие великое и отпуст.
На литургии: Прокимен, Апостол, Аллилуарий и Евангелие Преподобному.